ਇਹ ਬਦਾਮ ਅਖਰੋਟ ਕਿਵੇਂ ਪਚਾ ਲਓਗੇ !

ਮੇਰੇ ਵਿਆਹ ਦੇ ਕੁੱਛ ਦਿਨਾਂ ਬਾਅਦ ਮੇਰੀ ਮਾਸੀ ਮੈਨੂੰ ਪੁੱਛਦੀ ਏ ਕਿ ਤੂੰ ਨਾ ਤੇ ਵਿਆਹ ਵਾਲੀ ਛਾਪ ਪਾਈ ਏ,  ਤੇ ਨਾ ਹੀ ਤੂੰ ਵਿਆਹ ਵਾਲੀ ਚੈਨੀ ਪਾਉਂਦੈਂ, ਗੱਲ ਕੀ ਹੈ? ਮੈਂ ਮਾਸੀ ਨੂੰ ਦਸਿਆ ਕਿ ਦੋ ਕਾਰਣ ਨੇ - ਪਹਿਲਾ ਤੇ ਇਹ ਕਿ ਮੈਨੂੰ ਜ਼ਾਤੀ ਤੌਰ ਤੇ ਇੰਝ ਲੱਗਦੈ ਕਿ ਸੋਨੇ ਵਰਗੀ ਚੀਜ਼ ਔਰਤਾਂ ਦੇ ਲਈ ਹੈ, ਬੰਦਿਆਂ ਨੇ ਕਿ ਕਰਨਾ ਇਹ ਸੋਨਾ ਫੋਨਾ ਆਪਣੇ ਉੱਤੇ ਲਦ ਕੇ, ਦੂਜੀ ਗੱਲ ਜਿਹੜੀ ਪਹਿਲੀ ਤੋਂ ਵੀ ਕਿਤੇ ਖਾਸ ਹੈ ਉਹ ਇਹ ਹੈ ਕਿ ਜਿਹੜੀਆਂ ਤੀਵੀਆਂ ਮੇਰੇ ਕੋਲ ਇਲਾਜ ਵਾਸਤੇ ਆਉਂਦੀਆਂ ਨੇ, ਉੰਨਾ ਵਿਚੋਂ ਬਹੁਤ ਸਾਰੀਆਂ ਅਜਿਹੀਆਂ ਹੁੰਦਿਆਂ ਨੇ ਜਿੰਨਾ ਨੇ ਹੱਥ ਚ' ਪਲਾਸਟਿਕ ਦੀਆਂ ਚੂੜੀਆਂ ਤੇ ਉਂਗਲੀਆਂ ਵਿਚ ਲੋਹੇ ਦੇ ਛੱਲੇ, ਗਲੇ ਚ' ਕਾਲੇ ਧਾਗੇ ਪਾਏ ਹੁੰਦੇ ਨੇ, ਮੈਂ ਮਾਸੀ ਨੂੰ ਆਖਿਆ, ਤੂੰਹੀਓਂ ਦਸ ਮਾਸੀ, ਇਹੋ ਜਿਹੇ ਲੋਕਾਂ ਅੱਗੇ ਮੈਂ ਸੋਨੇ ਦੀ ਸ਼ੋਬਾਜ਼ੀ ਕਿਵੇਂ ਕਰ ਸਕਦਾਂ, ਮੇਰੇ ਕੋਲ ਨਹੀਂ ਹੁੰਦੀ ਇਹ ਪਾਖੰਡਬਾਜ਼ੀ। .. ਮਾਸੀ ਨੇ ਹੀ ਬੱਸ ਇਹ ਇੱਕੋ ਵਾਰ ਪੁੱਛਿਆ ਸੀ, ਹੋਰ ਕਦੇ ਕਿਸੇ ਨੇ ਨਹੀਂ ਪੁੱਛਿਆ !!

ਮੇਰੇ ਕਹਿਣ ਦਾ ਮਤਲਬ ਇਹੋ ਹੈ ਕਿ ਜੇ ਮੈਂ ਸੋਨੇ ਦੀਆਂ ਅੰਗੂਠਿਆਂ, ਚੈਨੀਆਂ ਤੇ ਲੋਕਟ ਪਾ ਕੇ ਅਜਿਹੇ ਮਰੀਜ਼ਾਂ ਸਾਮਣੇ ਬੈਠਾ ਹੋਵਾਂਗਾ ਤੇ ਉਹਨਾਂ ਦੇ ਦਿਲ ਚਂ' ਕੀ  ਚਲ ਰਿਹਾ ਹੋਵੇਗਾ !!

1990 ਦੀ ਇਹ ਗੱਲ ਦਾ ਕਲ ਧਿਆਨ ਆ ਗਿਆ , ਜਦੋਂ ਇਕ ਮਿਨਿਸਟ੍ਰੀ ਦੇ ਇਕ ਫੁਰਮਾਨ ਦਾ ਪਤਾ ਲੱਗਾ ਕਿ ਹੁਣ ਓਥੇ ਡਿਪਾਰਟਮੈਂਟ ਦੀਆਂ ਸਾਰੀਆਂ ਮੀਟਿੰਗਾਂ ਚ ਬਿਸਕੁਟਾਂ ਦੀ ਜਗ੍ਹਾ ਫੁਲਿਆਂ ਛੋਲੇ, ਭੁੰਨੇ ਹੋਏ ਛੋਲੇ, ਬਦਾਮ ਤੇ ਅਖਰੋਟ ਪੇਸ਼ ਕੀਤੇ ਜਾਣਗੇ - ਸਾਰੀ ਗੱਲ ਪੜ੍ਹੀ - ਇਹ ਵੀ ਲਿਖਿਆ ਚੰਗਾ ਲੱਗਾ ਕਿ ਪਾਣੀ ਵੀ ਜੱਗ ਚ ਰੱਖਿਆ ਮਿਲੇਗਾ,  ਕਾਗਜ਼ ਦੇ ਡਿਸਪੋਸਬਲ ਗਲਾਸਾਂ ਚ' ਹੀ ਮਿਲਿਆ ਕਰੁ - ਫੁਲੀਆਂ ਛੋਲੇ, ਭੁੰਨੇ ਹੋਏ ਛੋਲੇ ਵਰਗੀਆਂ ਚੀਜ਼ਾਂ ਤੇ ਠੀਕ ਨੇ, ਪਰ ਸਰਕਾਰੀ  ਮਾਇਆ ਨਾਲ ਬਦਾਮ ਤੇ ਅਖਰੋਟ ਵੀ ਖਰੀਦੇ ਜਾਣਗੇ, ਇਸ ਗੱਲ ਦਾ ਬੜਾ ਅਫਸੋਸ ਹੋਇਆ।

ਜਿਸ ਵੇਲੇ ਦੀ ਮੈਂ ਇਹ ਖ਼ਬਰ ਦੇਖੀ ਹੈ ਮੈਨੂੰ ਇਹੀ ਲੱਗਦੈ ਕਿ ਜਦੋਂ ਏ.ਸੀ ਕਮਰਿਆਂ ਚ' ਇਹ ਅਖਰੋਟ-ਬਦਾਮ ਦੇ ਨਾਸ਼ਤੇ ਚਲ ਰਹੇ ਹੋਣਗੇ ਉਸ ਵੇਲੇ ਐਲ.ਸੀ.ਡੀ ਸਕ੍ਰੀਨਾਂ ਤੇ ਜੇਕਰ ਭੁੱਖਮਰੀ ਨਾਲ ਦਮ ਤੋੜਣ ਵਾਲੇ ਬੱਚਿਆਂ ਦੀਆਂ ਤਸਵੀਰਾਂ ਕਿਸੇ ਚੈਨਲ ਤੇ ਦਿੱਖ ਗਈਆਂ, ਤਾਂ ਕਿੰਝ ਤੁਸੀਂ ਉਹਨਾਂ ਬਦਾਮਾਂ ਤੇ ਅਖਰੋਟ ਦੀਆਂ ਗਿਰੀਆਂ ਨੂੰ ਆਪਣੀ ਸੰਘੀ ਥੱਲੇ ਲੰਘਾ ਪਾਓਗੇ, ਜੇ ਲੰਘ ਵੀ ਗਏ ਅੰਦਰ ਤਾਂ ਕੀ  ਉਹ ਪਚ ਜਾਣਗੇ, ਇਹ ਵੀ ਦੇਖ ਲਿਓ।

ਦੂਜੀ ਗੱਲ ਇਹ ਵੀ ਹੈ ਕਿ ਕਈ ਵਾਰੀ ਚੈਨਲਾਂ ਤੇ ਅਸੀਂ ਵੇਖਦੇ ਹਾਂ ਕਿ ਸਰਕਾਰੀ ਮੀਟਿੰਗਾਂ ਚ ਪਾਣੀ ਦੀਆਂ ਬੋਤਲਾਂ ਮੇਜਾਂ ਤੇ ਪਈਆਂ ਦਿੱਖ ਜਾਂਦੀਆਂ ਨੇ, ਜੇ ਕੀਤੇ ਹੁਣ ਦੂਰ ਦਰਾਜ ਭੁਖਮਰੀ ਦੇ ਸ਼ਿਕਾਰ ਲੋਕਾਂ ਨੂੰ ਮੇਜਾਂ ਤੇ ਬਦਾਮ ਅਖਰੋਟ ਵੀ ਨਜ਼ਰੀਂ ਪੈ  ਪਏ ਤੇ ਫੇਰ ਓਹੀ ਗੱਲ ਹੋ ਗਈ ਨਾ - ਪਲਾਸਟਿਕ ਦਿਨ ਚੂੜੀਆਂ ਪਹਿਨਣ ਵਾਲੀਆਂ ਸਾਮਣੇ ਸੋਨੇ ਦੇ ਕੜੇ ਪਾ ਕੇ ਬਹਿ ਜਾਣਾ।

ਮੇਰੇ ਖਿਆਲ ਚ ਇਹ ਬਦਾਮ ਅਖਰੋਟ ਮੀਟਿੰਗਾਂ ਚ' ਸਰਵ ਕਰਨ ਵਾਲੀ ਗੱਲ ਠੀਕ ਨਹੀਂ ਹੈ, ਇਹ ਫੁਰਮਾਨ ਵਾਪਸ ਹੋਣਾ ਚਾਹੀਦੈ - ਵੈਸੇ ਵੀ ਜੇ ਇਕ ਵਾਰ ਇਹ ਆਰਡਰ ਲਾਗੂ ਹੋ ਗਏ ਤੇ ਫੇਰ ਕਈ ਕਮੇਟੀਆਂ ਹੋਰ ਬਣਨ ਗੀਆਂ - ਕਿੰਨੀ ਮਿਕਦਾਰ ਦੀ ਖਰੀਦ ਹੋਵੇਗੀ, ਕੀ ਬੱਜਟ ਹੋਵੇਗਾ, ਕਿਥੋਂ ਖਰੀਦਿਆ ਜਾਵੇਗਾ ਇਹ ਡ੍ਰਾਈ-ਫਰੂਟ।

ਜਿਸ ਦੇਸ਼ ਚ ਇੰਨੀ ਗ਼ਰੀਬੀ ਹੈ, ਇੰਨੀ ਭੁੱਖਮਰੀ ਹੈ, ਜਨਾਨੀਆਂ ਚ' ਖੂਨ ਦੀ ਢਾਡੀ ਕਮੀ ਹੈ, ਬੱਚਿਆਂ ਦੇ ਮਿਡ-ਡੇ ਮੀਲ ਦੀ ਹਾਲਤ ਸਾਡੇ ਕੋਲੋਂ ਛੁਪੀ ਨਹੀਂ ਹੈ, ਅਜਿਹੇ ਹਾਲਾਤ ਚ' ਸਰਕਾਰੀ ਮਹਿਕਮੇ ਦੀਆਂ ਮੀਟਿੰਗਾਂ ਚ ਬਦਾਮ ਅਖਰੋਟ ਰਗੜੇ ਜਾਣਗੇ, ਗੱਲ ਬਿਲਕੁਲ ਵੀ ਨਹੀਂ ਜਚ ਰਹੀ, ਨਾ ਜਚਨਾ ਤੇ ਬਹੁਤ ਛੋਟੀ ਗੱਲ ਹੈ, ਇਹ ਤੇ ਗੱਲ ਹੋਛੀ ਲੱਗੂ  , ਵੈਸੇ ਹੋਛਾਪਣ ਵੀ ਬਹੁਤ ਛੋਟਾ ਲਫ਼ਜ਼ ਹੈ ਇਸ ਸੋਚ ਲਈ - ਅੱਛਾ ਜੀ, ਤੁਸੀਂ ਹੀ ਦੱਸੋ ਇਸ ਨੂੰ ਤੁਸੀਂ ਕਿ ਕਹੋਗੇ, ਮੈਨੂੰ ਤੁਹਾਡੇ ਜਵਾਬ ਦੀ ਉਡੀਕ ਰਹੇਗੀ।

ਚਲੋ ਜੀ, ਹੁਣ ਮੂਡ ਥੋੜਾ ਠੀਕ ਕਰਣ ਲਈ, ਮੇਰੇ ਫੇਵਰਿਟ ਸਿੰਗਰਾਂ - ਬੀਬੀ ਰਣਜੀਤ ਕੌਰ ਤੇ ਮੁਹੰਮਦ ਸਦੀਕ ਨੂੰ ਸੁਣਦੇ ਹਾਂ - ਮੈਂ ਇੰਨਾ ਦੀ ਗਾਇਕੀ ਨੂੰ  ਬਹੁਤ ਪਸੰਦ ਕਰਦਾਂ - ਸਾਡੇ ਸਮਿਆਂ ਦੇ ਸਟਾਰ -  ਮੈਨੂੰ ਖਿੱਚ ਲੈ ਵੈਰੀਆ ਚੁਬਾਰੇ ਵਿਚ ਬਾਂਹ ਫੜ ਕੇ 😄

ਤੁਹਾਡਾ ਆਪਣਾ,
ਪ੍ਰਵੀਨ 

@ ਕੁਕਰੈਲ ਪਿਕਨਿਕ ਸਪਾਟ, ਲਖਨਊ - 30.6.19