ਆਰਾਮਪ੍ਰਸਤੀ - ਬੱਲੇ ਬੱਲੇ!!

ਅਸੀਂ ਐੱਨੇ ਸ਼ੱਕੀ ਹੋ ਗਏ, ਮੈਂ ਆਪਣੇ ਪੋਟਿਆਂ ਤੇ ਕਾਲਖ ਫੇਰ ਟੀ , ਕਿਤੇ ਕੋਈ ਫਿੰਗਰ ਪ੍ਰਿੰਟ ਤੋਂ ਕਿਸੇ ਫਰੌਡ ਚ ਹੀ ਨਾ ਫਸਾ ਮਾਰੇ 😂

ਪਹਿਲਾਂ ਸੁਣੀਦਾ ਸੀ, ਸਵਾਹ ਨਾਲ, ਮਿੱਟੀ ਚੀਕਣੀ ਨਾਲ ਵੀ ਲੋਕੀਂ ਹੱਥ ਲੈਂਦੇ ਸੀ ਧੋ. 

ਫੇਰ ਹੋਣ ਲੱਗੀ ਵਰਤੋਂ ਦੇਸੀ ਸਾਬਣ ਦੀ ਚਾਕੀ ਦੀ, 

ਫੇਰ ਸਾਡੇ ਵੇਲੇ ਤਕ ਲੈਫ਼ਬੁਆਏ ਚੜਿਆ ਸਾਡੇ ਹੱਥੀਂ, 

40-50 ਸਾਲ ਲੈਫ਼ਬੁਆਏ ਨੂੰ ਹੀ ਰਹੇ ਰਗੜਦੇ ਹੱਥੀਂ।…

ਚੰਗਾ ਲੱਗਦਾ ਸੀ, ਖੁਸ਼ਬੂ ਵੀ ਆਉਂਦੀ ਸੀ….

ਫੇਰ ਆਇਆ ਲਿਕਵੀਡ ਸੌਪਾਂ ਦਾ ਦੌਰ, 

ਪਰ ਮੇਰੇ ਵਰਗੇ ਲਾਈਫਬੁਆਏ ਦੇ ਸ਼ੁਦਾਈ ਕਿਤੇ ਆਣ ਵਾਲੇ ਸੀ ਬਾਜ਼….

ਫੇਰ ਜਦੋਂ ਮੋਟੀ ਤਗੜੀ ਲੈਫ਼ਬੁਆਏ ਦੀ ਚਾਕੀ ਲੱਗਣ ਲੱਗੀ ਬਹੁਤੀ ਭਾਰੀ, 

ਉਸਦੇ ਦੋ ਟੁਕੜੇ ਕੀਤੇ ਜਾਣ ਸ਼ੁਰੂ ਹੋਏ….

ਕੰਪਨੀ ਨੂੰ ਲੱਗਾ ਪਤਾ ਹੋਉ, ਉਹਨਾਂ ਚਾਕੀ ਦਾ ਸਾਈਜ਼ ਹੀ ਕਰ ਮਾਰਿਆ ਛੋਟਾ।…

ਫੇਰ ਵੀ ਰਿਹਾ ਲਾਈਫਬੁਆਏ ਹੀ ਆਪਣਾ ਫੇਵਰਿਟ। …

ਫੇਰ ਲੱਗ ਗਏ ਕਈ ਸਾਲ ਕੋਰੋਨਾ ਦੇ ਲੇਖੇ, 

ਸਾਡੀਆਂ ਕਈਂ ਆਦਤਾਂ ਜਿਵੇਂ ਆਇਆ ਸੀ ਉਹ ਬਦਲਣ, 

ਸਨੇਟਾਈਜ਼ਰ ਪਰਧਾਨ ਹਰ ਪਾਸੇ, ਘਰਾਂ, ਹੋਟਲਾਂ, ਗੱਡੀਆਂ ਚ, 

ਸੰਜੀਵਨੀ ਬੂਟੀ ਵਾਂਗ ਉਸ ਨੂੰ ਗਿਆ ਵਰਤਿਆ, 

ਖੀਸੇ ਚ ਪਈਆਂ, ਬੀਬੀਆਂ ਦੇ ਪਰਸਾਂ ਚ’ ਰੱਖੀਆਂ ਇਹ ਬੋਤਲਾਂ,

ਹੈਰਾਨੀ ਵੱਲ ਗੱਲ ਤਾਂ ਇਹ ਕਿ ਹੱਥ ਜਿਹੋ ਜਿਹੇ ਵੀ ਹੋਣ

ਬੂਟੀ ਸਨੇਟਾਈਜ਼ਰ ਦੀ ਕਿਵੇਂ ਕੱਢ ਦੇਉ ਸਾਰੇ ਵੱਟ…

ਖੈਰ, ਕੁਝ ਦਿਨ ਪਹਿਲਾਂ ਜਦੋਂ ਮੈਂ ਹੱਥ ਲੱਗਿਆ ਧੋਣ, 

ਦੱਬਦੇ ਹੀ ਬੋਤਲ ਦਾ ਢੱਕਣ , ਸਿੱਧੀ ਭੁੜੱਕ ਕੇ ਆਈ ਝੱਗ ਬਾਹਰ

ਮੈਨੂੰ ਲੱਗਾ ਬੋਤਲ ਨੂੰ ਲੱਗੀ ਗ਼ਲਤੀ ਜਾਂ ਮੈਨੂੰ ਕੋਈ ਟਪਲਾ 

ਹੱਥ ਤਾਂ ਚਲੋ ਧੁਚ ਹੀ ਜਾਣੇ ਸੀ, ਪਰ ਉਹ ਧੁਚਨ ਵਾਲੀ ਫੀਲ ਵੀ ਤਾਂ ਹੈ ਜ਼ਰੂਰੀ, 

ਓਹ ਕਿਵੇਂ ਆਵੇ !! 

ਹੈਰਾਨ ਤਾਂ ਮੈਂ ਸੀ, ਪਰ ਲੱਗਾ ਐਵੇਂ ਹੀ ਆ ਗਈ ਹੋਣੀ ਏ ਝੱਗ…

ਫੇਰ ਅਗਲੇ ਇਕ ਦੋ ਦਿਨ ਵੀ ਇੰਝ ਹੀ ਹੋਇਆ, ਸਿੱਧੀ ਝੱਗ ਬਾਹਰ।..

ਆਖਰ ਪੁੱਛਣਾ ਹੀ ਪਿਆ, ਇਹ ਸਿੱਧੀ ਝੱਗ ਸੁੱਟਣ ਵਾਲਾ ਕਿਹੜਾ ਹੈ ਖੇਡ! 

ਇਹ ਲਿਕਵਿਡ ਸੋਪ ਦਾ ਹੀ ਹੈ ਕਮਾਲ, ਦੱਬਣ ਤੇ ਝੱਗ ਹੀ ਸੁਟਦਾ ਏ, ਜਵਾਬ ਮਿਲਿਆ!! 

ਪਰ ਦੋਸਤੋ ਆਪਣਾ ਤਾਂ ਜੀ ਨਹੀਂ ਮੰਨਦਾ , ਲੈਫ਼ਬੁਆਏ ਤੋਂ ਬਿਨਾ, 

ਐਡੀ ਵੀ ਕਿਹੜੀ ਹੋ ਗਈ ਆਰਾਮਪ੍ਰਸਤੀ, ਸਾਬਣ ਦੀ ਗਾਚੀ ਹੱਥਾਂ ਤੇ ਮਲੇ ਬਿਨਾ, 

ਆਪਸ ਚ’ ਚੰਗੀ ਤਰ੍ਹਾਂ ਰਗੜੇ ਬਿਨਾ, ਹੱਥ ਕਿਵੇਂ ਹੋ ਗਏ ਸਾਫ. 

ਇਹ ਗੱਲ ਸਾਨੂੰ ਤਾਂ ਹਜ਼ਮ ਨਹੀਂ ਹੁੰਦੀ। 

ਇਸੇ ਕਰਕੇ ਹੁਣੇ ਹਾਜਮੋਲਾ ਦੀ ਡੱਬੀ ਦੇ ਨਾਲ ਨਾਲ ਕਰ ਦਿੱਤੀਆਂ ਨੇ ਆਰਡਰ 

ਚਾਰ ਚਾਕੀਆਂ ਲਾਈਫ ਬੁਆਏ ਦੀਆਂ । ….

ਪ੍ਰਵੀਨ ਚੋਪੜਾ 

21.10.25